Judg 2 | ZomZIV | STEP | Gilgal panin TOPA vansawltak Bokim ah paito a, “Egypt panin note kong paikhiatpih to a, na pute uh tungah piak dinga ka ciamsa gamah kong pi hi. Keimah in, ‘Note tawh ka thukhun ka palsat ngei kei dinga,

Judges 2

Bokim ah TOPA Vansawltak

1 Gilgal panin TOPA vansawltak Bokim ah paito a, “Egypt panin note kong paikhiatpih to a, na pute uh tungah piak dinga ka ciamsa gamah kong pi hi. Keimah in, ‘Note tawh ka thukhun ka palsat ngei kei dinga, 2 note in hih gama teng mite tawh thukhun na bawl kei ding uh hi, ahi hangin amau biakna-taute na phelgawp ding uh hi,’ kong ci hi. Tua hi napi no lah ka thu nong mang kei uh hi. Bang hangin hici gamtat na hi uh hiam? 3 Tua ahi ciangin tu-in note mai pan amaute ka hawlkhia nawn kei ding hi, cih kong gen hi; note pangah amaute ling hi dinga note adingin a pasiante uh thang a suak ding hi,” a ci hi. ^a

4 TOPA’ vansawltak in Israel-te khempeuh tungah hihte a gen ciangin amaute nakpi-in kap uh a 5 tua mun Bokim b a ci uh hi. Tua lai-ah amaute in TOPA tungah biakna a pia uh hi.

Thuman’lohna le Lelhna

6 Joshua in Israel-te a kikhenthang-sak khit ciangin amaute luah nading gam a la dingin a kuan ciat uh hi. 7 Joshua a nuntak hun sung le amah sanga sawt a nungta zaw upate a nuntak hun sung teng mite-in TOPA na sem uh a, amaute in TOPA in Israel adingin a sep na lianpite a mu uh hi.

8 TOPA nasempa Nun’ tapa Joshua kum za le sawm khat a phakin a si hi. 9 Tuateh amaute in Gaash Vum leilu-lam, Ephraim mualtung gam sunga om Timnath Heres c, ama luahna leitang ah a vui uh hi. ^b

10 Tua khang khat buppi a pate uh kiangah a kigawm khit ciangin TOPA ahi a, Israel ading ama nasepsate ahi zongin a theikha lo khang dang khat a khang hi. 11 Tua ciangin Israel-te in TOPA mit ah a hoih lo gamta-in Baal-te’ na a sem uh hi. 12 Amaute in Egypt pana a paikhiatpih TOPA a pate uh Pasian, a taisan khin uh hi. Amaute kim le pama om mite pasian tuamtuamte zui-in a bia uh hi. 13 Amaute in amah a nusiatna uh leh Baal le Ashtoreth-te na a sepna uh tawh TOPA a hehsak uh hi. 14 Israel tungah TOPA a hehna hangin amah in amaute mi simsaka a na uh a sutsak hi. Akim-a om galte khempeuh tungah amaute zuak-a, a nang zo nawn kei uh hi. 15 Gal sim dingin Israel a kuankhiat nak leh amaute tunga a ciamsa bang tektekin TOPA khut amau langah pangin a lel uh hi. Amaute a lungdong mahmah uh hi.

16 Tua ciangin TOPA in amaute a simte khut pana hon dingin thukhente d a khangsak hi. 17 Tua hi napi thukhente thu ngai lo uh a pasian dangte tungah kizuakin tuate a bia uh hi. A pate uh tawh kibang lo uh a, a pate uh totsa TOPA thupiakte man’na lampi panin amaute a pial pahpah uh hi. 18 A nuainette bawlsiatna nuai-ah amaute a tau uh ciangin TOPA in khuatuah ahi manin amaute adingin thukhente a khansak simin TOPA in thukhente ompih a, thukhente a nuntak laiteng a galte uh khut panin amaute a honkhia hi. 19 Ahi hangin thukhente a sih ciangin, a pate uh aa sangin a siazaw lampi nangawn ah kihei kikin pasian dangte zui uh a, a na semin a bia uh hi. Amaute in a gamtatsia uh le a lungkhauhna uh a khia nuam kei uh hi. ^c

20 Tua ciangin Israel tungah TOPA heh mahmah a, “Hih minamte in a pute uh adingin ka khunsa thukhunte palsatin ka thu ngai lo uh ahi manin 21 Joshua in a sih a, a nusiat lai minamte khat beek amau mai pan ka hawlkhia kei ding hi. 22 Amaute in a pate uh sepsa bangin TOPA lampi zui-in a tawn uh hiam a tawn kei uh hiam, Israel zia-etna-in amaute ka zang ding hi,” a ci hi. 23 TOPA in tua minamte a om lai ding uh a phal hi; Joshua khut sungah amaute a piakna tawh thakhatin a hawlkhia pah kei hi.